VW-Trophy 2010 

Do nonemool d Eggdate:

Teil 1 - Mittwoch, 13.10.10 - 19:00 ASAG Dreispitz: Allgemeinwissen

Teil 2 - Mittwoch, 20.10.10 - 19:00 Rest. Baggestoos im Glaibasel: Döggeliturnier

Teil 3 - Mittwoch, 27.10.10 - 19:00 ASAG Dreispitz: Montagsmaler

Teil 1 – Allgemeinwissen

6 Knights hän dr erschti Spiildaag voller Vorfreud in Agriff gno.
Es isch in dr ASAG alles fyr e super Event vorbereitet gsi….
> e Zapfhahne
> sensationelli Fleischbälleli
> e fackundigi Jury
> und nodirlig 9 vo 12 offizielle Fanclubs

Nach em erschte Gerschtesaft isch es denn au grad loos gange! Die erschti Froog vom Fuessballquiz – und es isch au fyr uns Neui sofort klar
worde – dr Atzge het e Flair fyr dr düütschi Fuessball! Es sich aigentlig der ganz Obe um unsere nördlige Noochbar gange. Mir hän uns fyr s erschte Mool ganz tapfer gschlaage und nach 40 – teilwiis wirglig abstruuse – Frooge 21 Pünggt erziehlt. Ai Froog isch no bi dr ‚Rächtsabteilig’ hängig und ai Froog het dr Preesi verlauert – är het s falsche Schild uffe ghebt!

Also d Knights stöhn nach em erschte Daag uff em säxte Platz und hän im Momänt acht Pünggt Ruggstand uff dr Leader d Bebbis! Uff jede Fall hän mer e Punggtesiig an der ‚After-Spiil-Party’ erziehlt. D Knights sin scho bi der erschte Teilnahm als Letschti gange!! Also nonemool e härzligge Dangg an mini Mitstriiter – Gaby, Marc, Gina, Mike und Moni.

Und jetzt kunnts am näggschte Mittwuuch zum zweite Teil – Döggle im Baggestoos! Mir sind in einere Gruppe mit den Bravehearts und de Ravens duur e Pascal Schürpf und dr Yann Sommer usgloost worde!

Teil 2 – Döggeliturnier

Nach dr Usloosig vom letschte Mittwuuch und em ‚Sichtigstraining’ vom letschte Sunntig sind mir sehr zueversichtlig in Baggestos pilgeret.
D Spiiler (Svensson13 = the wall und Mike = the finisher) und d Knights Cheerleaders (e diggs Danggscheen an d Susanne, d Gina und d Moni)
sin vor em erschte Spiil top motiviert und heiss gsi. Dr Preesi het in dr Zwyyschezyt versuecht mit die beide ‚gegnerische Preesi’
e ‚Päggli’ z mache - wie sich den nach de Gruppespiil usegstellt het – ohni Erfolg! ;-(

Nach dr Vorrundi het me e wirgligg feini Zwyyscheverpflägig beko – nei nid scho wiider Bier – sondern e super Härdöppeflsalat und e feine Fleischkäs! Fyr d Finalrundi het dr Trainer den d Gheimwaffe (dr Preesi?!?) ygwäggslet. Und es het am Aafang au usgseh als ob die taggtischi Variante e volle Erfolg kennti si. Doch scho gly hän sich die konditionelle Mängel und e gwüsses Konzentrationsmanko bim Preesi bemerkbar gmacht und so hän d Knights trotz stargge Defensivleischtige au die zwei Platzierigsspiil verlore. Frei nach em Motto:
Wenn sie Vorne nicht machsch, bekunnsch sie Hinde!

Und so isch fyr uns – trotz Allem – e mega luschtige Obe leider mit em letschte Platz z Änd gange! Aber au geschter hän mer e Punggtesiig an der ‚After-Spiil-Party’ erziehlt. D Knights hän wiider zu de Letschte ghört wo usem Baggestos usegloffe sin! Well mer gescht nid eso vyyl Pünggt gmacht hän, sin mer woorschinlig uff e letschte Platz abgrutscht.

Aber am näggschte Mittwuuch wärde mer bim Abschlussevent in dr ASAG nonemool zueschloo und ych bi yberzüggt, dass mer s Fäld no vo Hinde wärde uffrolle!

Teil 3 – Montagsmaler  

Nach dr Ernüchterig vom letschte Mittwuuch, het dr Preesi nach emene
Klausurdaag und emene intensive Brainstorming doch no miesse zer
Gheimwaffe griffe und dr Vice-Preesi ins Kampfgetümmel vom dritte
Spiildaag wärfe und so hän mer geschter sogar e Delegation vo 7 Knights
an Abschlussevent kenne schigge.
Nach dr Vorstellig vo de ‚Künschtler’ (Georg Heitz, Numa Frossard,
Remo Meister und Gusti Nussbaumer) und dr Regelkund dur e Benjamin Bruni
het die erschti Rundi kenne in Agriff gno wärde – und d Gehimwaffe het sich
scho ab dr ereschte Minute als Glüggsgriff erwiise – d Knights sin als erschti
uff dr Azeigetafele gstande – merci bOllé! Au in dr zweite Rundi het d Moni
derfyyr gsorgt, dass d Knights immer unter dr Top Drey gsi sin. Während im Ysatz
vom dritte Knights het den dr Preesi fyr Bewegig bi de Zueschauer gsorgt –
nach emene reglkonforme Yflüschtere vonere Lösig, hän die andere Fanclubs das System
sofort au agwändet und ab däm Zytpunggt isch Niemer meh gsässe!
Es isch denn nodirlig fyr d Jury mümme aifach gsi in däm riisige Gschrey
z ghöre wär die richtigi Lösig z erscht gseit het. Aber dangg em bOllé und dr Moni
hän d Knights Pünggt um Pünggt gmacht und dr Platz an dr Spitze
vom däm Wettbewärb bis zem letschte Begriff kenne behaupte. Am Schluss
het denn e gmeinsame erschte Platz mit de Bravehearts usegluegt!
Chapeau und diggs Merci an das sensationelle Team vo de Basel-Knights
- Gaby, Susanne, Gina, Monika, Mike und bOllé!
Wie letscht Wuuche akündigt hän d Knights nonemool Alles gäh und s Fäld -
dangg däm Daagessiig - wirglig no vo Hinde uffgrollt!
Am Schluss vo unsere erschte VW-Trophy het e guete 7. Platz usegluegt und wenn
meh Schlussranglischte aluegt – sin mir uff kei Fall abgfalle! Mit e bitzeli meh
Wettkampfglügg am 2. Daag wär e Yberraschig mögligg gsi.
Ych ka numme sage – Alli wo nid derby gsi sin, hän Ebbis verpasst!
Do no d Schlussranglischte (in Klammere d Pünggt nach em 2. Daag):
1. Orgesiss (35) 50
2. Bravehearts (28) 47
3. Bebbi (34) 44
4. St. Jakob (30) 43
5. Basilisk (29) 42
5. Dragons (28) 42
7. Basel-Knights (22) 41
8. Gilgenberg (25) 30
9. Ravens (24) 32
Nach däm Resultat isch es nodirlig numme logisch gsi, dass mer au gescht z Obe wiider bi de Letschte gsi sin wo sich uff e Heiwäg gmacht hän!
tÖmmeli